Stolz fliege d'Flugi rund um d'Wält.
D'Swissair isch gsund und het vyl Gäld
und 's Schwyzergryz, wo d'Flosse ziert
het heggschte Standard garantiert.
Au d'Aggtie styge, 's isch e Gnuss.
> Kai Gnoche dänggt an lkarus.

Die Fluggsellschaft, die expandiert,
no sälte het si so rentiert
und näbbscht de Fluggescht au d'Piloote
behandlet me mit Sammetpfoote.
Me läbbt halt no im Iberfluss
> und kaine dänggt an Ikarus.

Bi däm Profit in dääre Sparte
losst d'Konkurränz nit uff sich warte.
D'Flugbrys kemme under Drugg,
was haisse wott, der Gwinn goht zrugg.
Das macht den Aggtionär Verdruss
> doch kain dänggt no an Ikarus.

Will's aige Fluggschäft nimm wott laufe
entschliesst me sich, zerscht d'Crossair z'kaufe,
was national gsee kennt bedytte:
me schafft e Konkurränt uff d'Syte.
Zwor finde d'Bebbi sich jetz bschisse
> so fascht wie glaini lkarisse.

Global keyt s'Fluggschäft uff e Ranze,
drum haisst's ney Zauberwort "Allianze".
Und alli renommierte Nämme
schliesse sich ganz aifach zämme.
Numme d'Swissair, die blybt duss.
> 's dänggt halt e kain an Ikarus.

Au d'Swissair wurd Allianze schetze,
wenn si sich derft an d'Spitze setze.
Si kauft drum, praktisch ab der Gant
d'Sabena yy uus zwaiter Hand
samt AOL, vor Laadeschluss.
> 's dänggt als no kain an Ikarus.

Scho kunnt der Bruggisser ins Schwärme,
e neye Deal isch grad im Schärme:
Är goht in Portugal und Pole
go wytter so maroodi Airlines hole.
Im Kaufrusch isch är voll im Schuss
> Är kennt d'Gschicht nit vom lkarus.

Me bittet d'Swissair bees ans Kässeli,
si fillt die boodeloose Fässli.
D'Verwaltigsreet und d'Diräggtoore
bikemme langsam rooti Ohre.
Mit "Sigg?Sagg?Sugg" und ych bi duss
> umgehn si d'Gschicht vom Ikarus.

Und wärde oobedry wie gwohnt
fir d'Fählentschaid firschtlig belohnt.
Zwor hänn die Gselle d'Swissair gschlisse,
doch wär kains het, macht sich kai Gwisse.
Es gehn e Huffe Stelle hi
> bim lkarus ischs nit so gsi

Me fliegt der Corti yy als Retter, denn zämme mit ein Suter sett er dä Schärbehuffe wider fligge. Druff maint dr Moritz bald: Du Digge, wenn ihr nit uff mi loose wänn isch Schluss,
> denn goht's eych wie ein lkarus.

Trotz Spritzene vo Bund und Bangge
kunnt d'Swissair wytterhi ins Wangge,
respektiv, me muess es saage,
si lyt scho dootgrangg uff ein Schraage.
Si isch im Greesewahn versoffe,
> Dasch au bym Ikarus so gloffe